புழைக்கடையில் செங்கழுநீர்ப் பூக்கள்
மலர்ந்து விட்டன !
உங்கள்
புழைக்கடைத் தோட்டத்து வாவியுள்
.........செங்கழுநீர் வாய்நெகிழ்ந்து ஆம்பல்வாய்
கூம்பினகாண் !
செங்கல்
பொடிக்கூறை வெண்பல் தவத்தவர்
.........தங்கள் திருக்கோயில் சங்கிடுவான்
போகின்றார்
எங்களை
முன்னம் எழுப்புவான் வாய்பேசும்
.........நங்காய் எழுந்திராய் ! நாணாதாய் நாவுடையாய் !
சங்கொடு சக்கரம் ஏந்தும்
தடக்கையன்
.........பங்கயக் கண்ணானைப் பாடு ஏல் ஓர்
எம்பாவாய் !
-----------------------------------------------------------------------------------------
---------------
அடி அம்மா ! உங்கள் புழைக்கடைத் தோட்டத்துக் குளத்தில் காலையில் மலரும் செங்கழுநீர்ப் பூக்கள் மலர்ந்து விட்டன. இரவில் மலரும் அல்லிப்பூக்கள் மீண்டும் மொட்டாகி விட்டன. பொழுது புலர்ந்துவிட்டது. காவி அணிந்தவர், வெள்ளைப் பற்கள் கொண்ட தவ முனிவோர்கள் கண்ணன் திருக்கோயிலுக்கு வணங்குவதற்குப் போய்க் கொண்டிருக்கிறார்கள் !
ஏடி ! எப்போதும் எங்களை நீயே எழுப்புவதாக
வாய் வீச்சு வீசுவாயே, இப்பொழுது நாங்களல்லவா உன்னை எழுப்ப
வேண்டியிருக்கிறது. எழுந்திரு ! எழுந்திரு
! அந்தச் சங்கு சக்கரம் ஏந்திய கார்மேக
வண்ணனைப் பாடிப் பணிந்து புகழ்ந்திட எழுந்து வா ! கோபிப் பெண்ணே ! எழுந்து வா !
-----------------------------------------------------------------------------------------
சொற்பொருள்:-
--------------------------
புழைக்கடை = வீட்டின் பின் பக்கம்; வாவி = குளம் (பொய்கை); செங்கழுநீர் = செங்குவளைப் பூ; வாய் நெகிழ்ந்து = இதழ் விரித்து மலர்ந்துவிட்டது; ஆம்பல் = அல்லிப் பூ; வாய் கூம்பின காண் = இதழ் குவித்துக் கூம்பிவிட்டன; செங்கல் பொடி = செங்கல் நிறம் போன்ற காவி வண்ணமுடைய ; கூறை = ஆடையை அணிந்து;
வெண்பல்
தவத்தவர் = முனிவர்கள் ;
திருக்கோயில்
சங்கிடுவான் = திருக்கோயிலில் கூடுவதற்கு; போகின்றார்
= செல்கின்றனர்; எங்களை
முன்னம் எழுப்புவான் வாய் பேசும்= நான் வந்து உங்களையெல்லாம் எழுப்பி அழைத்து
வருவேன் என்று வாய் வீச்சுக் காட்டினாயே; நங்காய்
எழுந்திராய்= உன் பேச்சுக்கு மாறாக இன்னும் உறங்கிக் கொண்டு இருக்கிறாயே ! பெண்ணே
! எழுந்திரு !;
நாணாதாய்
நாவுடையாய் = உனக்கு வெட்கமாக இல்லையா; இப்போதாவது எழுந்திரு ! சங்கொடு சக்கரம் = சங்கும்
சக்கரமும் ; ஏந்தும் தடக்கையன் = தன் கைகளில் ஏந்தியுள்ள
கண்ணபிரான் ; பங்கயக் கண்ணானை = தாமரை போன்ற கண்களை உடைய
கண்ணனை; பாடு ஏல் ஓர் = போற்றிப் பாடி வணங்குவோம் !!; எம்பாவாய் = பதுமை போன்ற பெண்ணே !
எழுந்து வாராய் !
------------------------------------------------------------------------------------------
ஆக்கம் + இடுகை:
வை.வேதரெத்தினம்,
(vedarethinam70@gmail.com)
ஆட்சியர்,
”தமிழ்ப் பாவை” வலைப்பூ.
[திருவள்ளுவராண்டு:
2053, விடை (வைகாசி) 01]
{15-05-2022}
-----------------------------------------------------------------------------------------
கருத்துகள் இல்லை:
கருத்துரையிடுக